Paula Carballeira. Non te equivoques.

Continuamos coa nosa campaña en defensa do rural e hoxe súmase a esta iniciativa Paula Carballeira escritora, actriz e contacontos.

Non te equivoques…

A poesía non está só na rima.

Hai poesía

No mar onde comezas a viaxe

No almorzo, entre o pan e o chocolate

No arrecendo a leña do inverno

No caer maino da xeada, da neve

No vento

A poesía pon lentes de sol nas mañás do verán

Sabe a café e a empanada

A poesía lembra o brillo das estrelas sobre as montañas

Mais tamén as curvas desas estradas

Polas que abandonas os motores

E corres

Soñando ser paxaro

Sen niño

Pega que volve ao campo

Río

A poesía non está só nos versos

Nin nas palabras

Hai máis poesía na tinta que escribe o camiño das luras

Ou nos carreiros que cruzan as leiras

A poesía anda solta

Poderías non cruzarte nunca con ela

Pero sempre alguén te leva ao seu encontro

Cun sorriso

Porque sabe

Que a poesía vai saltarche á cabeza

Coa percusión dunha melodía

O ataque dun enxame de imaxes

E quererás agarrala

Pechala

Nun poema

Pero…

Non te equivoques…

A poesía é libre

Tan libre

Coma ti

Lembra

                                                                                                

    Paula Carballeira