Concentracións por unhas #aulasseguras

Prezadas familias,

Todas sabedes o moito que aconteceu nas últimas dúas semanas, logo de termos un verán de absoluto despropósito, onde houbo que agardar a que pasaran as eleccións para termos unhas instrucións de principio de curso o 22 de xullo, logo de que a consellaría de educación estivera desaparecida constantemente, o 27 de agosto houbo unha reunión do ministerio coas comunidades autónomas, que propicia unhas novas instrucións o 31 de agosto.

A esas instrucións novas contestamos rotundamente, certo que introducían o metro de medio de distancia de seguridade nos IES, pero a cambio retiraban toda a protección en primaria – inventando esa cousa inútil que deron en chamar “grupos de convivencia estábel”- , reducían a hixiene nos centros, non incorporaban o persoal imprescindíbel, non escoitaron a ninguén e fixeron o que sabían facer: nada.

Non dicimos que fora pola nosa réplica, aínda que algo teriamos que ver, pero a principios de mes, cesaron á conselleira e nomearon de novo a un vello coñecido, Román Rodríguez, que xa fora conselleiro antes da persoa a quen releva; foi unha sorpresa, pero aínda foi peor un par de días despois cando se cesa a toda a cúpula da consellaría de educación, xente que levaba 11 anos no posto, e se nomea a outras persoas.

Tamén foi unha sorpresa que o novo-vello conselleiro convocara ao Consello Escolar de Galiza o día 4 de setembro, un órgano que levaba case un ano silenciado -como non pasou nada en educación neste último ano- ; e máis aínda que nese Consello Escolar fixera unhas declaracións de si pero non, quizais, e pode ser; o do metro e medio hai que medilo ben, o de contratar mais profesorado tampouco é para todas, o das clases presenciais pode ser máis ou menos, e así fomos entendendo que a cousa ía empeorando por momentos.

O 11 de setembro o novo secretario xeral da consellaría convocou con menos de dúas horas de tempo ás centrais sindicais e ás confederacións de anpas -alí estivo o noso presidente- para informar de que o comezo do curso de secundaria adiábase unha semana, porque había moito que facer aínda nos centros. Pero o único que hai que facer nos centros é  desfacer o que se fixera en aplicación das instrucións do 31 de agosto, que só tiñan unha cousa boa, a separación de metro e medio nas aulas, co resultado de ter que  contratar a moitas docentes e ter aulas de menos xente, pero iso é caro e xa viñeron a resolvelo.

No medio os sindicatos docentes convocaron unha folga de ensino os días 10 e 16, nos comezos do curso de primaria e secundaria, as confederacións de anpas de ensino público apoiamos esa folga.  E o día 10 fíxose e foi un éxito. Cunha maioritaria non asistencia da chavalada ás aulas que comezaban ese día.

Co adiamento do inicio do curso, adiouse tamén a convocatoria da segunda folga. Agora farase o día 23. Pero os sindicatos que convocan decidiron aproveitar a data do 16 de setembro para promover mobilizacións en todas as cidades e vilas galegas, mobilizacións que nos invitan a compartir,  e que compartimos con vós neste momento.

Todas sabedes que nas asembleas que fomos mantendo estes días pasados non falamos nunca de mobilizacións, ou falamos de que non eran posíbeis polas normas excepcionais de seguridade; nós interpretabamos que as restricións á xuntanza de persoas para celebrar reunións limitaban ese dereito, e acatámolo porque a seguridade está por diante da protesta.

Pero neste momento temos máis datos, as subdelegacións de goberno están entendendo que a única limitación que se pode aplicar sería a distancia de seguridade de 1,5 metros entre os grupos de tamaño limitado  que participen na mobilización; ou sexa, se a limitación é de dez persoas, poderemos mobilizarnos se facemos grupos de dez persoas máximo, separadas 1,5 metros co seguinte grupo.

Iso é unha boa nova no que ten que ver coa posibilidade de mobilizarse, aínda que nós pensamos que a distancia de seguridade debe ser a máxima posíbel sempre, igual que o pedimos nas aulas, tamén queremos esixírnolo nas rúas.

Con todo o que aconteceu, e sabendo que a nosa postura de reivindicación non cambia, entendemos que non é necesario facer novas asembleas que reafirmen o que xa está acordado: estamos en contra desta xestión de risco coa saúde das nosas fillas e fillos, e coa nosa indirectamente, e queremos que as aulas teñan a máxima seguridade e a mellor calidade posíbel.

Por iso, coa seguranza de que estamos sempre defendendo a mesma causa, convidámosvos a participar nas mobilizacións do día 16 de setembro. Serán pola tarde, ás 19 horas, nos lugares que se detallan no cartaz, e pedímosvos que veñades, con máscaras, con todo o coidado, con atención, e coa forza que nos dá sabermos defensoras e coidadoras das nosas fillas e fillos.

Reivindicaremos máis profesorado, menos alumnado en cadansúa aula, máis limpeza nos centros, gratuidade para os produtos sanitarios que utilicen as crianzas, currículos adaptados para que o estudantado poida doadamente con eles neste ano de recuperación, máis diálogo con nós, que somos a parte máis necesaria da comunidade educativa, e máis medios para o Ensino Público.

Para reclamar todo iso temos que movernos, con coidado, con respecto, máis tamén con seguridade e forza, coa que nos dá ser nais e pais do Ensino Público Galego, querelo e defendelo.

Difundide esta convocatoria e vide canda todas, cun lazo negro, ou un brazalete negro, que é a nosa imaxe nesta pelexa, pero sobre todo co ánimo de que nos escoiten dunha vez:

Queremos para as nosas fillas e fillos o mellor ensino que poidan ter, e ese ten que ser o ENSINO PÚBLICO GALEGO.