Cambios de xornada nos tempos da Covid
A situación actual ten que ser unha oportunidade para a mellora de liberdades, un momento no que todas debemos ser absolutamente coidadosas co cumprimento das normativas e co mantemento dos dereitos adquiridos, sobre todo se falamos de calidade educativa. A Confederación ANPAS GALEGAS rexeita totalmente a variación de xornadas, sequera momentaneamente, que non estean realizadas estritamente de acordo co establecido na normativa vixente, máis aínda cando o que se está a furtar en ocasión é a precetiva consulta aos Consellos Escolares e ás familias.
Así llo acabamos de dicir á consellaría, así llelo dicimos á comunidade educativa e á prensa.
Estamos en crise sanitaria, que ninguén pretenda convertila nunha crise de dereitos !!
Dende a Confederación Anpas Galegas queremos denunciar a situación de indefensión das familias diante da actitude das direccións de varios centros de ensino en todo o territorio galego, co beneplácito das Xefaturas Territoriais de Cultura, Educación e Universidade no que se refire á autorización de cambio de xornada, amparándose na “excepcionalidade” do contexto da COVID-19.
Unha vez máis vemos como se intenta excluír as familias da comunidade educativa con calquera escusa, sexa a hipotética imposibilidade de xestionar os comedores organizados erroneamente co voluntariado, ou a cuestionable razón de que se o alumnado está menos tempo no centro escolar, ten menos posibilidades de contaxiarse.
En calquera caso todo isto non valida a decisión nin das direccións dos centros nin das Xefaturas Territoriais de Cultura, Educación e Universidade, de incumprir os procedementos contemplados na lexislación, neste caso na “Orde do 29 de maio de 2008 pola que se establece o procedemento para a implantación da xornada lectiva en sesión única de mañá ou mixta nas escolas de educación infantil, colexios de educación infantil e primaria, colexios rurais agrupados, centros públicos integrados, centros de educación especial e centros privados concertados”, na que se dispón claramente o procedemento a seguir:
Primeiro.- Obxecto e ámbito de aplicación.
A presente orde regula os requisitos e o procedemento para a autorización nas escolas de educación infantil, colexios de educación infantil e primaria, colexios rurais agrupados, centros públicos integrados, centros de educación especial e centros privados concertados dependentes da Consellería de Educación e Ordenación Universitaria da implantación das seguintes xornadas lectivas:
a) en sesión única de mañá
b) nunha xornada mixta: posibilitaranse outras xornadas cun mínimo de 2 tardes á semana mantendo un total de 25 horas semanais.
Segundo.- Requisitos
a) En sesión única de mañá:
1. Acordo do Consello Escolar, por maioría dos tres quintos dos seus membros.
2. Acordo do Claustro de profesores e profesoras, por maioría dos tres quintos dos seus membros.
3. Informe favorable do Servizo de Transportes da Delegación Provincial, conforme ao previsto no epígrafe sétimo da presente orde, cando o centro docente teña trasporte escolar.
4 . Acordo favorable do 58% do total do censo das nais, pais ou titores legais do alumnado. Para os efectos de establecer o total do censo computaranse a nai ou o pai ou un dos titores legais do alumnado da etapa na que se pretende cambiar a xornada.
5. Plan específico de actividades extraescolares.
b) Nunha xornada mixta:
1. Acordo do Consello Escolar, por maioría dos tres quintos dos seus membros.
2. Acordo do Claustro de profesores e profesoras, por maioría dos tres quintos dos seus membros.
3. Informe favorable do Servizo de Transportes da Delegación Provincial, conforme ao previsto no epígrafe sétimo da presente orde, cando o centro docente teña trasporte escolar.
4. Acordo favorable da maioría absoluta do total do censo das nais, pais ou titores legais do alumnado. Para os efectos de establecer o total do censo computaranse o pai ou a nai ou un dos titores legais do alumnado da etapa na que se pretende cambiar a xornada.
5. Plan específico de actividades extraescolares.
Polo tanto, esiximos o cumprimento da normativa no que se refire ao procedemento do cambio de xornada, e a inmediata recuperación das xornadas ordinarias aprobadas en todos os centros educativos galegos que a viran modificada polas circunstancias expresadas neste escrito.