ANPAS Galegas participou nunha xuntanza coa Consellería de Educación
O pasado día 19 de outubro, as representantes de ANPAS Galegas acudimos á convocatoria de xuntanza da Secretaría Xeral Técnica da Consellería de Cultura, Educación e Universidade para falar da Orde de axudas para comedores xestionados polas ANPAS e o Acordo sobre medidas que melloran o funcionamento do sistema educativo e as condicións do persoal funcionario e laboral docentes da comunidade autónoma de Galicia que imparte as ensinanzas reguladas na Lei orgánica 2/2006, do 3 de maio, de Educación, asinado recentemente.
Novidades sobre as axudas para comedores xestionados polas ANPAS
En concreto informáronnos da subida da cuantía da subvención do 20% por comensal, cunha subida total do orzamento dun 33%, de 1,2 millóns de euros a 1,6 millóns.
Dende ANPAS Galegas volvimos a reivindicar o comedor non só como servizo complementario senón tamén educativo, e a xestión directa (cociña nos centros escolares) como o modelo que garantiza a maior calidade e control.
Asemade incidimos na necesidade de profesionalización das persoas coidadoras de comedor e que teñan a formación axeitada para traballar con nenas e nenos.
Tamén insistimos na necesidade de axilizar os trámites para cubrir as baixas dos cociñeiros ou cociñeiras dos comedores escolares xa que se están a dar situacións caóticas que ás veces tardan varios días en resolverse.
Sobre o acordo con sindicatos da mellora do sistema e condicións do persoal funcionario e laboral docentes
Sobre o acordo asinado cos sindicatos, desde ANPAS Galegas só entramos a valorar as cuestións que atinxen directamente ao alumnado fundamentalmente a baixada de ratios, onde o tempo para reducilos en secundaria é excesivamente longo, xa que nos sitúa no curso 27-28 para inicialos en 1º da ESO e non podemos deixar de lembrar que o alumnado de FP Básica debera ter unha ratio inferior, dado o seu perfil e os agrupamentos. De novo, reivindicamos a necesidade dun cambio no modelo educativo para os colexios do rural a propósito deste tema.
E agardamos ser convocadas en próximas datas para falar, non “dos problemas do ensino público”, senón de cousas concretas coma o transporte, a pésima xestión dos comedores de xestión indirecta, a xestión de Edixgal e tantas outras problemáticas que continuamente demandamos e precisan diálogo e concrección por parte da consellaría.
