ANPAS Galegas celebra o seu X Aniversario
Con alegría e orgullo anunciamos que o vindeiro venres 1 de decembro o edificio CERSIA acollerá a celebración dun evento conmemorativo do décimo aniversario da Confederación ANPAS Galegas.
O programa previsto para este evento, ao que se poderá asistir por invitación, é o seguinte:
- 18:00 h. PRESENTACIÓN, a cargo de Isabel Calvete, Fernando Lacaci e Javier Sánchez
- 18:30 h. VISUALIZACIÓN DO VIDEO
- 18:45 h. CHARLA: “A comunicación clave da convivencia na comunidade educativa”, impartida por Xosé Ramos Rodríguez e Mariló Candedo Gunturiz, pedagogos e membros de Nova Escola Galega.
- 19:30 h. REMATE DO ACTO E PETISCOS.
Os nosos primeiros dez anos traballando a prol do ensino público
Parece que foi onte, pero ANPAS Galegas xa leva unha década adicada a fortalecer e defender o ensino público. Esta é unha ocasión para recoñecer e agradecer a participación activa das familias na construción da nosa comunidade escolar. Sen o seu voluntariado e compromiso, non teriamos chegado a conseguir moitas das melloras destes últimos anos, ou ben o camiño para acadalas de seguro sería moito máis complexo.
É este tamén un momento para salientar que contamos con folgos renovados, polo que ANPAS Galegas continuará loitando durante (agardamos) moitos anos máis, perseguindo o mesmo obxectivo dos comezos: garantir un ensino público de calidade para todas as crianzas.
A nosa forza está na nosa unión!
