RESUMO DA XUNTAZA COA DX DE ORDENACIÓN E INNOVACIÓN EDUCATIVA, TEMA: PROBAS DE AVALIACIÓN DIAGNÓSTICA
O xoves 22 de febreiro do 2024, levouse a cabo unha reunión coa participación da Dirección Xeral (DX), representada por Judith Fernández, o Subdirector de Inspección Enrique Prado, e o Xefe de Servizo de Avaliación, Manuel Calada, xunto coa Confederación ANPAS Galegas, representada por Isabel Calvete (presidenta) e Eva Vila (secretaría).
Tratamos de resolver dúbidas sobre a implementación das probas de avaliación diagnóstica no presente curso escolar, segundo o establecido na LOMLOE, co propósito de diagnosticar o estado do sistema educativo. Estas probas se levarán a cabo en 4º de primaria e 2º de educación secundaria, sen efectos académicos, senón como ferramentas formativas, informativas e orientadoras para os centros.
Os resultados das probas non se publicarán individualmente, senón que se proporcionará un informe global do centro. Os centros terán autonomía para deseñar e executar os seus plans de mellora baseados nestes informes, aínda que aqueles con resultados insatisfactorios recibirán unha tutela especial por parte da Inspección educativa.
Aclarouse que todas as probas diagnósticas adaptaranse para incluír ao alumnado con necesidades educativas especiais, e así tamén serán incorporados estatisticamente ao proceso de avaliación. Preparáronse materiais específicos para este fin e estableceuse contacto coa ONCE para atender ao alumnado con discapacidade visual.
Informouse que se publicarán indicacións detalladas para os centros e elaborarase material informativo para as familias. Ademais, está a prepararse un documento formal de presentación das probas e outro de aclaración de dúbidas potenciais das familias, solicitando a nosa participación para facer achegas adicionais.
A DX comprométese a aclarar calquera dúbida adicional que poidamos ter. Destacouse a importancia de que as probas transcorran sen contratempos e cunha ampla participación, xa que son fundamentais para avaliar o sistema educativo. Salientouse que estas probas son internas e non deben ser percibidas como exames competitivos.
