Carta ao conselleiro de Educación sobre a introdución da nova figura de coordinador de benestar
A/A D. Román Rodríguez, conselleiro de Educación, Ciencia, Universidades e Formación Profesional
Dende ANPAS Galegas non estamos de acordo coa introdución da nova figura de coordinador de benestar e convivencia tal e como aparece recollida no capítulo V: Educación e innovación da Lei 5/2024, de 27 de decembro, de medidas fiscais e administrativas, xa que esta figura réstalle poder o papel das familias e a Comisión de convivencia, en adiante Comisión, en todo o relativo a convivencia no centro escolar, posto que:
- Esta figura será membro do profesorado e será elixida directamente polo director do centro educativo, polo que se lle quita peso ao consello escolar ( no que está representada toda a comunidade educativa) que é o encargado de nomear as representantes da Comisión. Ten que ser o Consello Escolar, como máximo órgano de representación do centro, ou no seu defecto a propia Comisión, a que elixa quen vai desempeñar este cargo e non ser nomeada a dedo por un cargo directivo.
- A priori esta figura non forma parte da Comisión, pero é un órgano controlador da mesma, xa que entre as súas funcións están coordinar o plan de convivencia en coordinación coa dirección do centro. Se a Comisión é a que ten que elaborar o plan o lóxico será que sexa a propia Comisión quen coordine dito plan, ou que elixan entre os seus membros a un coordinador e non que este lle veña imposto dende a dirección do centro.
- Outro aspecto que nos chama moito a atención é que parece que o Coordinador de Benestar e Convivencia non ten que render contas do traballo que fai, salvo coa Dirección do centro e co Departamento de Orientación que é con que traballa directamente, pero na lei non aparece recollido nada o respecto. O igual que a Comisión debería de presentar unha memoria ante o Consello Escolar e a Inspección Educativa para poder avaliar o seu traballo, que sexa a comunidade educativa e non quen o puxo no cargo quen avalíe o traballo que fai.
Esiximos que nos faga saber como vaia a artellar a convivencia entre a Comisión e esa Coordinadora, porque non vemos posible tal convivencia cando esta figura ven imposta. Tamén queremos saber como vai a casar o que pon o artigo 2.1.4 da Lei 472011 que recolle que “Todos os membros da comunidade educativa son axentes responsables da convivencia escolar….e participaran na elaboración, no desenvolvemento, no control do cumprimento e na avaliación do plan de convivencia e das normas de convivencia do centro” con esta figura que converten en referente elixida unicamente por un director, porque a comunidade educativa está representada no Consello Escolar e están a quitarlle o control que este exerce na convivencia do centro educativo.
Aínda que esta figura puidera supoñer unha mellora na convivencia do centro educativo, a forma de elección e de traballo que se lle atribúen non son correctas. A Comisión tería que ser o referente no relativo a convivencia no centro educativo e non unha figura que ven imposta pola dirección sen que os demais membros da comunidade educativa teñamos nin voz nin voto sobre a súa elección.
