2 de abril – Día Mundial de Concienciación sobre o Autismo
O 2 de abril, Día Mundial de Concienciación sobre o Autismo, constitúe unha oportunidade para avanzar na reflexión colectiva sobre o grao de inclusión real das persoas con Trastorno do Espectro do Autismo (TEA) no noso sistema educativo e na sociedade en xeral.
Malia os progresos acadados nos últimos anos, cómpre recoñecer que persisten importantes dificultades que limitan a participación plena do alumnado con TEA en igualdade de condicións. As barreiras no ámbito educativo, social e comunitario seguen a evidenciar que a inclusión efectiva continúa a ser un reto pendente.
Desde as Anpas Galegas, consideramos imprescindible reforzar o compromiso co dereito a un ensino inclusivo, garantindo os apoios necesarios, a formación adecuada e os recursos suficientes para atender a diversidade do alumnado.
Así mesmo, resulta fundamental avanzar cara a contornos educativos que non só integren, senón que inclúan de maneira real, respectando os ritmos, necesidades e potencialidades de cada neno e nena.
Neste contexto, o 2 de abril non debe limitarse a unha xornada de sensibilización, senón que debe servir como impulso para a adopción de medidas concretas que fagan efectiva a igualdade de oportunidades.
Cómpre tamén poñer o foco nos protocolos e medidas que, malia estaren recollidos na normativa, non sempre se cumpren na práctica diaria. A existencia de guías, plans e recursos resulta insuficiente se non vai acompañada dunha vontade real de aplicación efectiva nos centros educativos e nos distintos ámbitos da vida das persoas con TEA. É preciso pasar dos discursos teóricos ás accións concretas, garantindo que as adaptacións, apoios e estratexias se implementen de maneira sistemática e continuada, respondendo ás necesidades reais das persoas no seu día a día.
A inclusión non pode ser un obxectivo teórico, senón unha práctica diaria sostida polo compromiso de toda a comunidade educativa e das administracións públicas.
