En xeral a resposta a esta pregunta está no que digan os Estatutos da Asociación, e hai tantas posibilidades como estatutos.
Maioritariamente, as directivas son nomeadas polas Asembleas en dúas modalidades:
- Ou ben a Asemblea vota á directiva e aos cargos que a compoñen.
- Ou ben a Asemblea vota á directiva, e logo esta, internamente, escolle aos cargos que a compoñen entre as súas propias compoñentes.
Igualmente ocorre coas renovacións parciais, as opcións maioritarias son dúas:
- Se a potestade de escoller os cargos é da asemblea, ten que ser tamén a asemblea quen escolla os cargos de calquera modificación que poida ocorrer.
- Se a potestade de escoller os cambios é da Xunta directiva, será esta quen decida quen substitúe aos cargos que cesen, por calquera circunstancia, pero sempre escollendo dentro das persoas que formen parte da directiva.
En calquera caso, se o que se debate é a incorporación de novas persoas á directiva, esta incorporación sempre terá que facerse logo de votación en Asemblea Xeral.
En canto ás listas abertas ou pechadas, semella lóxico, xa que todas as socias son electoras e elixíbeis, que as listas deberan ser sempre abertas. É máis, nin sequera debera haber listas, as persoas que desexen presentarse como candidatas a formar parte da xunta directiva, deberan facelo directamente na asemblea xeral e ser votadas alí mesmo, positiva ou negativamente.
As listas pechadas son sempre unha diminución da pluralidade á hora das eleccións, e por máis prácticas que semellen resultar, non son aconsellábeis no mundo asociativo, onde deberiamos tender sempre á maior representatividade e inclusión nos órganos de dirección, aínda que iso supoña maior tensión na toma de decisións, precisamente porque esa tensión é espello real das opinións de conxunto.
