Non só podemos senón que temos esa obriga. Porque a persoa que representa á ANPA no consello escolar non vai alí para expor a súa opinión, vai para expor a opinión da ANPA.

E para poder expola correctamente, ten que procurar saber cal é esa opinión, e non hai outro xeito de facelo máis que facilitándolle ás socias a información necesaria para que poidan emitila.

Pero isto ten varios límites, o primeiro é a confidencialidade necesaria, no hipotético e estrañísimo caso de que haxa algún dato que mereza ese coidado, lembrade que non se pode difundir información que inclúa datos de carácter persoal (pero é raro que nunha convocatoria do Consello Escolar se inclúan estes datos).

O segundo límite será organizativo, normalmente non é posíbel conseguir a opinión de toda a asociación para unha convocatoria que pode chegar só con 48 horas de anticipación. Así que quizais neses casos a consulta coa Xunta directiva poida ser abonda para formarse unha opinión conxunta. Esa fórmula de traballo debería estar falada e acordada en Asemblea Xeral.

E o terceiro límite é o grao de importancia que teña a decisión, a representación da ANPA no Consello Escolar ten que saber, pola súa vinculación á asociación, que temas son importantes, e cales outros son simplemente de trámite. Cada vez que alguén solicita o uso das instalacións, e esa solicitude se presenta ao consello escolar, non imos convocar unha asemblea xeral para valoralo, porque xa deberiamos coñecer a postura da ANPA para eses casos.

Como en todo, hai que manter a proporción, pero xenericamente falando, a obriga de informar para poder representar eficazmente, e tamén para poder comunicar a posteriori, é unha das funcións da representación da ANPA no Consello Escolar.