Si, pero logo de cumprir os seguintes requisitos.

• Ten que estar aprobado na asemblea xeral que ese vai ser un dos métodos de comunicación da ANPA, e establecer cal vai ser o método ou métodos alternativos de comunicación para aquelas persoas que non desexen utilizalo.
• Hai que contar coa autorización individual de cada persoa de quen se pretenda utilizar o teléfono. E esa autorización ten que ser explícita (non serve o de “coa sinatura deste formulario aceptas que…; non, ten que haber un lugar onde se pregunta se dá a súa autorización para utilizar o seu teléfono nun grupo de WhatsApp da ANPA e que a persoa poida indicar claramente que SI quere).
• Ten que limitarse o seu uso ao que a Asemblea Xeral establecera; non serve utilizalo para calquera cousa e circunstancia.
• E, por suposto, hai que manexalo con moitísimo coidado. A ANPA non é responsábel do que alí se diga por parte das nais e pais que o integren (iso tamén debe quedar claro na asemblea e constar na acta), pero si que é responsábel do que digan as persoas que son membros da directiva da ANPA  e actúan como tales. Así que o mellor é nomear a unha única persoa que fale en nome da asociación, deixar clara constancia de que é así, e o resto das participantes, sexan membros ou non da directiva, falaran sempre en nome propio.