As socias da ANPA son sempre persoas físicas, que reúnan a condición de ser nai/pai/titor/titora dun alumno-a do centro escolar. E así de limitativo. Non existe o concepto de familia -formalmente falando- no seo dunha ANPA.

E calquera persoa socia ten o dereito a votar e ser votada para dirixir a asociación; polo tanto non hai ningún impedimento para que a Asemblea escolla a dous membros dunha parella como parte da directiva; nin tampouco para que a propia Asemblea xeral, ou a Xunta directiva se é quen ten a competencia, escolla a esas dúas persoas para calquera cargo, aínda que sexan as dúas que van dispor dos fondos da asociación.

Dito isto, sería de agardar por parte de quen as escolle, sexa a asemblea ou sexa a directiva, algo de sentido común e que non caian no erro de nomealas para presidencia/secretaría, ou presidencia/tesouraría, porque en certa medida iso escurece a transparencia da asociación. Pero ilegal non é, e máis aínda cando é, en todos os casos, unha decisión acordada por un grupo máis amplo.