VOLTA A CLASES DE 2º BACHARELATO
Dende a Confederación Anpas Galegas, e en relación ao proxecto de resolución da Consellería de Educación, Universidade e Formación Profesional pola que se reinicia a actividade lectiva no curso 2019-2020, se determinan as instrucións para o que resta do presente curso e se adoptan medidas de prevención e hixiene para a apertura parcial nos centros de ensino non universitario dependentes da Consellería, queremos compartir as dúbidas que xorden para as familias e que é preciso resolver.
Unha vez máis estamos a ver como a Consellería de Educación permanece á espera de que alguén asuma as responsabilidades que ela mesma ten, ante a situación tan grave que estamos a vivir. Se apoiamos, a petición das familias, a decisión de que os alumnos que vaian presentarse ás ABAU retomen as clases presenciais para a súa preparación, sempre foi co compromiso das máximas garantías de seguridade.
Mais compre aclarar previamente como se van impartir as clases presenciais aos alumnos de 2º de bacharelato e cursos superiores de FP á vez que o resto dos alumnos que non se incorporen de maneira presencial; e tamén como vai ser a atención que se presta ao alumnado doutros cursos que comparta profesorado que imparta clases presenciais. Tamén é importante indicar que existe unha fonda diferenza entre teleformación e retransmisión en directo da clase. (puntos:2.2,2.3), polo que rexeitamos que a atención non presencial quede cuberta simplemente con esa retransmisión.
En canto as medidas de hixienización das aulas é unha irresponsabilidade pretender deixar este labor nas mans do alumnado nunha situación tan grave coma esta. Calquera limpeza das instalacións do centro ten que realizarse por profesionais. É a única garantía de que se faga correctamente. (4.3,7.5,8.4,9.5,13.2)
Rexeitamos a decisión de que sexan os equipos directivos quen organicen o retorno ás aulas así como a compra do material preciso para manter as condicións de seguridade, isto pode crear unha desigualdade de criterios que fan difícil crer nunhas garantías reais.(5.2)
Voltamos a esixir instrucións concretas e homoxeneamente aplicábeis en todos os centros galegos para a incorporación do alumnado ás aulas en menos dunha semana.
