Primeira xuntanza da confederación ANPAS GALEGAS no curso 2019 -2020

A confederación ANPAS GALEGAS tivo a súa xuntanza bimensual ordinaria, a primeira deste curso escolar, o pasado 27 de decembro, coa asistencia de representantes de todas as Federacións socias.

Falamos de plantexamentos xerais neste curso que comezamos, fundamentalmente da situación que se está a producir nos centros como consecuencia dos recortes de persoal, que inciden masivamente na atención á diversidade.

Mais tamén da incompetencia da administración educativa á hora de resolver as obras que ela mesma comeza e xestiona. Os centros galegos que saíron constantemente na prensa durante o verán como “o grande investimento que a consellaría ía facer”, non conseguiron comezar o curso con normalidade, porque a Xunta de Galicia non foi quen de rematar as obras e limpar os centros para que as crianzas tiveran unha entrada de curso saudábel e segura.  Constantes queixas das familias, e mesmo a organización de accións de protesta e rexeitamento foi o que marcou un comezo de curso que se caracteriza outra vez máis polo constante deterioro do Ensino Público Galego, e pola permanente fuga de cartos de todas cara ao ensino privado.

A Confederación ANPAS GALEGAS non quere limitarse á crítica, por máis necesaria que sexa, senón que anuncia que vai realizar unha serie de campañas neste curso 2019-2020, campañas que van ter como eixo principal a necesidade de difundir o coñecemento dos protocolos educativos, e da súa esixencia por parte das familias galegas; así como a necesidade de concienciar á sociedade sobre o gravísimo problema que está a supor o acoso escolar.

E, por suposto, manteremos constante a reivindicación dun ensino público formador en igualdade, como a canle fundamental para chegarmos a eliminar a violencia de xénero que está a manchar a nosa sociedade, o que xa comezamos a facer coa entrega, a todas as directivas das ANPAs asociadas, dunha ferramenta imprescindíbel na nosa formación: a Breve Guía para a coeducación que se inclúe na axenda anual realizada pola Confederación ANPAS GALEGAS.

Propoñemos que esa Guía, que pronto ha ser ampliada e editada independentemente para o uso xeral das familias interesadas, poida ser o cerne de múltiples actividades en defensa dunha Escola de todas e para todas.