O que nós odiamos é que non nos permitan expresarnos

Malos tempos, vivimos malos tempos cando hai xente que pensa que se pode cortar a liberdade, a de expresión, a de pensamento, a de manifestación, a de creación. Vivimos moi malos tempos, tempos moi pequenos intelectualmente cando alguén imaxina que as palabras fluídas e emocionantes da xuventude deben ser censuradas e tapiadas.

Unhas alumnas do IES Punta Candieira, de Cedeira, veñen de ver ofendida a súa creatividade por unha decisión absurda e extemporánea: retiráronlles unha exposición de poemas porque a alguén non lle pareceu correcto o que alí se versificaba.

Nós, a Confederación ANPAS GALEGAS,  non queremos que as nosas fillas e fillos sexan educadas no odio, nin no medo, nin na coacción; queremos que desenvolvan as súas personalidades en liberdade, porque a liberdade é o respecto que teñen por nós, polas nosas ideas e pensamentos, que se ha reflectir no que sentiremos por todas as outras persoas, con outras ideas e pensamentos.

Se non permitimos que as novas xeracións desenvolvan publicamente a súa creatividade, se tentamos limitar as súas maneiras, propias, xustas, e dignas, de expresión, peneirándoas a través dunha presunta verdade que deben aprender, estaremos negándolles o crecemento, privándoos do seu dereito a cambiar o mundo, tal e como nós pelexamos no seu momento por facer.

Nada hai do que se dixo, e moito menos ese fermoso poema que está en todos os medios de comunicación, que nos faga pensar na necesidade de que non sexa visualizado por todas as persoas; e congratulámonos de que -coma sempre ocorre cos actos das persoas de limitada visión- o maior resultado desa decisión absurda estea sendo o feito de ter agora unha repercusión e unha sona que sobarda con moito as expectativas que este mesmo alumnado tiña. Esa repercusión fainos pensar que mesmo nos malos tempos hai moita boa xente que non se rende, que non nos rendemos.

A nosa solidariedade coas alumnas que están a sufrir esa censura, tamén co profesorado que as apoia e que posibilitou esta e calquera forma de expresión libre. E o noso rexeitamento absoluto a todas as persoas que aínda son quen de ver un risco na palabra, na expresión artística e no pensamento. Nós non educamos neses valores, e non queremos que ninguén o faga coas nosas fillas e fillos.