COMEZA O PRAZO DE INSCRICIÓN NO II CONCURSO ANPAS GALEGAS-SOMOS RURAL
A Confederación ANPAS GALEGAS está inmersa de cheo no proceso de recepción de propostas para o II Concurso ANPAS GALEGAS-SOMOS RURAL, un xeito lúdico –aínda que esforzado- de defender o rural galego e as súas enormes posibilidades.
Xa pasamos a fase de pre-inscrición e xa sabemos quen quere participar, agora veñen catro meses de traballo para que o 30 de marzo próximo estean todos os proxectos presentados e poidamos valorar quen se leva o premio de 800 euros que outorgamos.
Hai que mirar o rural dun xeito positivo e seguro. Temos un espazo privilexiado, onde aínda perduran moitos dos nosos mellores valores, pero que tamén está en constante actualización para que vivir nel sexa unha experiencia de felicidade e non de privación. Nós adoitamos estar na reivindicación constante da mellora dos servizos e da atención ao alumnado galego, pero tamén queremos contribuír a esa mirada en positivo, a esa consideración do rural como un dos nosos maiores tesouros. E iso é o que facemos con este concurso, e cun resultado que foi estupendo na edición do ano pasado, podédelo ver en https://somosrural.anpasgalegas.gal/proxectos-1a-edicion. E seguro que este ano os proxectos son igualmente bos, e que conseguen achegarnos máis visións dese rural que queremos.
