Historias do protocolo de volta ao cole, visión das familias.

O problema do espazo nas aulas xa existía antes da chegada desta crise sanitaria e está provocado polas elevadas ratios. Isto non se vai solucionar retirando mobiliario que, entendemos, si é indispensable e por iso está aí e, de non selo, probablemente non exista un lugar alternativo de almacenaxe, que é o que acontece na maior parte dos centros.  Por outra banda, cando se suxire empregar aulas máis amplas, novamente somos testemuñas do ninguneo e menosprezo a materias como música, plástica ou educación física xa que son ás que se refiren directa ou indirectamente, dando a entender que non precisan os seus espazos diferenciados.
Finalmente, o uso obrigatorio da máscara pode ter consecuencias tanto sanitarias, por non poder garantir o seu emprego axeitado, como a nivel social, emocional e comunicativo, como xa advirten os expertos. A máscara impide unha comunicación natural, non permite visualizar as expresións faciais nin a vocalización, aspectos fundamentais na aprendizaxe da linguaxe e das habilidades sociais, tanto nas primeiras etapas da infancia como na adolescencia, onde a referencia social é o vehículo polo que aprenden a relacionarse co medio e coas compañeiras e compañeiros.